一品流芳

【流傳三代的港式滋味 】一品流芳 一品美食 流芳百世

位於黃埔花園第九期的「九號水產」中,有一間裝潢簡潔清新的港式麵食店。乍看之下,在雲集各種日式料理的地方顯得有點別樹一格,殊不知這間麵館經已流傳近半個世紀。

一踏入餐廳,您也許會先被其詩情畫意的名字所吸引。

「其實我哋好有歷史,以前喺七層大廈時已經有班粉絲,而家呢班人都仲好懷念我哋以前嘅味道。我哋想將呢啲傳統香港美食一直流傳落去,所謂一品美食;流芳百世。所以就諗咗呢個名。」餐廳負責人之一 Sam 說道。從中可見其飲食理念,是對味道與品質的一份堅持。

「我哋只用真真正正嘅食材,全部天然原料熬制,自己做不經他人手。而家好多餐廳可能會用方便快捷嘅方法,但我哋一定會以味道同品質行先,用番當年嘅方法炮制。例如蠔餅:全部即叫即整,半煎炸,唔會太油太乾。我哋既雲吞、丸、麵都係即叫即做,絕對唔會翻熱。」正正是這份堅持,令餐廳從六十年代「大笪地」的七層大廈時期開始,跨越三代至今始終滋味如一。

 

作為一間見證香港近半個世紀的老店,面對社會人口的轉變,自然也需要與時俱進。餐廳的食物質素固之然重要,但負責人亦坦言現在經營飲食業最重要的,始終是一份細心。隨著客人需求的改變,提供服務的層次也會有所不同,而不再是單純著眼於食品。「而家開餐廳要求好細微,例如夠唔夠紙巾、杯野夠唔夠熱、少甜定走甜,甚至有冇準備嘢俾小朋友,外國人識唔識用筷子,都要顧及。客人要求多咗,我哋需要諗嘅層面一定大咗好多好多。」

店內招牌「四大天皇」之一的一品牛皇麵,以牛筋、牛肚及牛腩為主。牛腩軟腍,燜得非常嫩口入味,鹼水麵麵質亦保持有嚼勁,令人一試難忘。豐盛配搭給客人帶來無窮新鮮感。

 

另一個「四大天皇」一品豬皇飯。豬肉丸、豬手及豬頸肉均以傳統手法烹調。當中的豬手製作亦絕不馬虎,炆得軟腍之餘每一口都帶有鮮味。

當傳統美食遇上新興手機APP外賣平台,又會擦出什麼火花呢?Sam 直言:「非常值得嘗試同發展!而家係物流年代,網絡俾到大家好多方便。以前開喺屋邨就真係做屋邨客,但而家互聯網同物流做得好好,可以好好利用,幫助我哋推廣。我哋一直好想將自己推廣到香港島,但好老實講,我哋自己好難做到。而家有你哋呢啲專業公司合作,何樂而不為。好老實講,魚翅日日食都會悶啦。如果我哋做來做去都係同一批客,發展空間就會好有限。」所謂「有危就有機」,在現今租金高昂的情況下,PLUM 積極打破地域限制,為的就是將這份歷久不衰的味道親自送到每一位客人手上。

看完這篇專訪,有沒有勾起您的食慾?快點聯同三五知己一齊去嘗試一下這間傳統港式老店的味道吧!

 

一品流芳

地址:紅磡黃埔新天地百合苑商場(第9期) 地下九號水產23-26 號舖

 

Share this post