時新featured image

【港式漢堡傳奇】 時新漢堡飽 -以心傳承的香港味道

【港式漢堡傳奇】 時新漢堡飽 -以心傳承的香港味道 時新漢堡店 - 一個深深植入港人腦中的港式小店名字,經歷過環境時代變遷,這家歷經四十載的老店重新出發,以最好的出品回饋多年支持的食客。今次 PLUM 有幸與時新漢飽店主理人,二哥鍾奇濤先生來一個訪談,由他娓娓道來時新如何由一間家庭式士多轉型成深受普羅大眾喜愛的漢堡店之變遷。
「偶然機會下,有朋友從外國番嚟,話當時香港完全冇呢樣食物 – 麵包夾香煎免治牛加醬料。佢話呢樣嘢好「OK」,問我爸爸有冇興趣試下。當製作完後俾大家試食,味道又真係好特別,於是漢堡包既雛形就誕生了。」
就是這樣,四十多年前,未有連鎖美式快餐店盛行下,第一個港產漢堡飽便由鍾家創作出來,當時名為「雜港包」的餡料以各種新鮮肉類攪拌配制,加上青瓜和水果混合而成的秘制沙律醬和自家烘製包餅,可以說是味道只此一家,很快便成了街坊至愛,更有很多人慕名而來。士多兼售炸雞脾、炸雞翼等食物,很快時新便由士多發展成一家快餐店。
作為一間家庭式經營的小店,凡事親力親為也是成功不可或缺的原素,「大概14、15歲左右,仲讀緊書,放學就要去鋪頭幫手,煎野、炸雞脾、賣野,咩都要做。我嗰個年代一定要幫屋企手,所以一有時間就會幫爸爸。」於時新工作多年,二哥為確保食品質素,多年來風雨不改每天早上六點開始工作,由食材準備到廚房整理,每晚十時才下班 ,「冇假放㗎,幾十年來都慣咗,最幸運係娶到個好老婆,有佢照顧家庭,我唔需要擔心任何嘢!」
在家庭的支持下,即使多辛苦仍能咬緊牙關走下去。現在父子兩代人一同回到這個地方,一起延續時新的精神。「我個仔本身喺間大公司做管理層,新鋪開咗幾個月生意好似幾好,我先問下佢有冇興趣接班,佢考慮咗一陣就話OK。」
多年來伴隨香港成長,但在各種因素影響下,時新也經歷不少起與跌,「咁多年嚟經歷過金融風暴、經濟不景,最大影響都係地理環境改變。我以前舊鋪喺碼頭廣場,人流好旺。但之後因為填海拆咗,變到好荒蕪,生意好淡。好多人都叫我結束,包括我爸爸。佢話如果我頂唔到,就不如唔好做,出租鋪位畀人反而唔洗咁辛苦。」幾許風雨,食客的支持,便是時新漢堡堅持下去的動力,「好多街坊後尾移咗民,由外國返嚟,都堅持來鋪頭搵我傾計,想食返我個包。所以我同爸爸講,一定要堅持落去!」
視漢堡飽如己出,每個都是二哥親手製作。對食品質素的堅持,也是二哥經營時新的執著,「食品而言,只要大眾接受咗,個味道就一定要堅持!創立後好多街坊食客都好鍾意,經過咁多年,有啲街坊年紀大咗,但佢哋嘅第二、三代都會嚟幫襯,所以我堅信哩個產品係得嘅!」時至今日,馳名全港的時新漢堡飽味道與舊日也沒有分別,即使搬遷到黃埔新店,「熟客來到,一試味道,個個都話,熟悉嘅味道返嚟啦!」
舊店結業初期,二哥明言沒有意思重開。但多年紮根紅磡地區,累積了一大班粉絲,「有時行街經常會有街坊問:喂老闆你幾時開返呀?如果唔係我哋就少咗個聚腳地喎!」即使有考慮在其他地區開鋪,但最後仍選回這個孕育ai時新的地方。「知道我哋番來黃埔,個個都好開心。有啲粉絲仲話一開窗聞到我嘅漢堡包味,就即刻衝出來買。聽到哩啲真係很開心!」
重新起航的時新在試業當日也為二哥打了一支強心針,「第一日試業係三點鐘開鋪,嘩⋯⋯當日朝早已經有人來排隊,連後生仔都有!當你見到咁嘅樣,你係驚嘅,係好震驚嘅!」即使首日成績出乎意料,但二哥卻謙虛稱道:「無論你之前有幾大成功,都一定唔可以驕傲!試業嗰時貨唔敢備太多,點知生意好唔好呀,如果開門冇人就死啦。所以當日只預左幾百隻包嘅貨。」當天開店短短三個多小時,已經售出差不多一千隻漢堡飽,供不應求,「我哋嚿肉係人手一個一個整出嚟,好花時間精力。當時賣咗成千隻,冇辦法只好限定人客買單層,個個都冇雙層。因為我哋太多粉絲,唔想佢哋山長水遠由香港仔出嚟,連一層都食唔到,唔想佢哋失望。」不想食客失望而回,卻被誤會成招牌雙層漢堡停售,現在二哥終於說出停售的原因,「當時唔賣雙層就唔係想改變,只係因為生產上配合唔到。嗰段時間我都非常唔好意思,好多人經過想幫襯都買唔到。」
作為本港首間自助式購票的餐廳,也跟上了互聯網時代的步伐,開設 FaceBook 專頁,Instagram 等新興社交平台,並和 PLUM 合作將時新漢堡飽帶給更多香港不同角落的食客。對於新興外賣 APP,「一般叫個外賣,淨係得附近嘅餐廳可以揀。但你哋個啲唔同,係跨區送餐。就算啲客喺好遠返工,都可以好簡單地食到我哋嘅食物,所以反應都好好。」二哥不諱言對 PLUM 的營運模式及雙方合作都表示認可,「我見到你哋用嘅架撐都好專業,做嘢效率又高,係一間有管理嘅公司,所以對你哋好有信心!香港地對外賣需求好大,無論邊度,一到午飯時間都逼爆人,同埋又冇咩嘢食,想食啲特別嘅嘢都搵唔到。又冇可能出嚟咁遠幫襯,一來一回都夠鐘返工啦。」
話音未落,廚房又傳來一陣陣煎漢堡扒的香味⋯⋯

 

時新漢堡飽

地址:紅磡黃埔新天地家居庭(第12期)地下G22-G23號舖

 

Share this post